З Днём ведаў!
Шаноўныя калегі! Дарагія вучні, бацькі!
Штогод першага верасня наша школа абуджаецца да жыцця, напаўняецца радаснымі дзіцячымі галасамі. І мы разам з нашымі вучнямі кожны год чакаем гэтае цудоўнае свята – Дзень ведаў. У імклівы сучасны век усё ж засталіся простыя рэчы, што нязменна радуюць чалавека, і бляск дзіцячых вачэй пры сустрэчы з роднай школай, з настаўнікам – адна з іх. Такія простыя чалавечыя радасці напаўняюць жыццё кожнага з нас вялікім сэнсам, выводзяць нашу працу на самыя высокія пазіцыі.
1 верасня – дата асабліва ўрачыстая і захапляльная, бо менавіта з гэтага дня пачынаецца няпросты шлях да ведаў, да новых дасягненняў.
У нашай школе з нагоды новага навучальнага года прайшла ўрачыстая лінейка, на якой уся ўвага была ім — першакласнікам і адзінаццацікласнікам. У добры шлях, школьная сямʾя, у імкненні да пазнання і мудрасці, да новых вяршынь і перамог!